特首梁振英突然間換人，雖然兩個局長位置，分別搵到劉江華同張雲正頂替，前者掌管民政事務、後者負責統領公務員，似乎都齊腳嘞喎，但唔好忘記，劉江華升呢前，係政制及內地事務局副局長嚟㗎，𠵱家佢因為獲國家委派新任務而令原有職位出現空缺，花生友相信最頭痛嗰個係政制局局長譚志源嘞。到底剩番兩年任期都冇，搵唔搵個新人頂替好？
唔好以為政制工作咁惡頂，冇乜人深入虎穴，據聞向梁班子中人主動獻身者唔少，但最終都好似冇乜下文，唔知係本身嘅人選未夠劉江華嘅水平、抑或未必同局長譚志源夾得嚟而落選？但幾肯定呢個副局長位真係風水位，坐過嘅人都會風生水起。

隨時得年半任期

好似譚志源咁吖，當年佢都係獲時任政制及內地事務局局長林瑞麟提攜，出任該局副局長，最後就升埋呢坐到正。譚志源坐正時，就搵嚟前AO黃靜文任副手，其後黃靜文就俾廠商會重金禮聘做CEO，轉戰工商界搵真銀咯。輪到敗選立法會後做譚志源副手嘅劉江華，唔夠3年就已經做到局長，難怪啲網民話佢嘅仕途猶如坐白金升降機咁快啦。
單睇呢3個例子，又難怪有人笑笑口以風水位形容呢個職位囉。既然前人都咁出色，睇怕譚志源搵人接任都幾頭痕。其實呢個位得番嗰兩年任期，扣埋揀人、任命程序等，怕且要幾個月至半年時間啩，搞得嚟呢屆政府都落任，唔知會唔會因此唔搵人住，令劉江華後繼冇人？

花生友
周二、四刊出