立法會噚日舉行開放日，主席曾鈺成初嘗做「伴遊」滋味，第一次以主席身份帶領市民參觀立法會大樓。噚日冇人問佢係咪中共黨員，大家最有興趣始終係毓民掟蕉事件。曾鈺成身為主人家，七情上面「案件重演」，作狀示範當日事發經過，又話如果日後再有議員掟蕉，就會請佢離場。
前幾年開放日長毛係焦點人物，今年輪到毓民出風頭，唔少市民搵佢合照。立法會秘書處今年搞搞新意思，特設影相區方便市民同議員影沙龍，知名度高嘅議員自然應接不暇，亦有唔少人爭相同「疑似中共黨員」，即係曾主席合照。
噚日共有3,773人參觀立法會，一次過睇晒會議廳、會議廳前廳、記者招待會室、記者採訪室、宴會廳及議員室等，連主席辦公室同秘書長辦公室都大公開。有個市民帶咗幾十隻蕉到場送畀議員，希望議員唔好掟蕉，多做實事。

推出公民教育網

立法會噚日又推出「公民教育網」，係立法會進一步推廣公民教育計劃嘅首個項目，目的係加強市民對立法機關工作和職能嘅了解。
秘書長吳文華話，新網站希望吸引到學生同青少年主動探索立法機關資料同訊息，市民可以透過網頁四個全新設計網上遊戲，測試對立法會嘅認識程度。