以為莫雷拉今季做番公司騎師，開鑼日（1日）可以贏到開巷，點知出足十場只得兩駒跑入位置，唔失望就假！

但睇番雷神點跑呢批馬，見佢好落心機去跑，贏唔到，可能實力不如人，際遇唔夠對手好，人有三衰六旺，唔使介意，佢老哥今季轉做公司騎師，我就好有信心可以贏番潘頓，一季流流長，好戲在後頭啊！

周日（8日）第二場「快樂實在」健康係有過問題，否則上季唔使去到5月先至復出，但呢匹超班馬，終歸都響莫雷拉胯下輕鬆贏咗場，盡顯佢四班超級實力。

今季健康穩定得多，早復課贏試閘姿態輕鬆，今場出馬少，對手幾乎全部都見晒底，揸住三班頂實力嘅「快樂實在」，可以執番場升班。

第四場大摩嘅「壽臣」四庭相配，靚靚仔仔仲要係栗色馬，一早已吸引阿棟嘅眼球，外地拎到一贏三位成績亦唔係善類，但深入睇過匹馬又問過馬房手足，話隻馬未服水土，想有表現都難。

所以上季安排多跑寓賽於操，有心等落班先部署，今季明顯見進步嘅馬，用到郭能又抽埋1檔起步，實行拼個你死我活。

第六場全哥嘅「數糊勇士」係阿棟高估咗嘅一匹馬，上季初贏馬姿態從容不迫，以為三班好快可以克服，點知跑極得個桔，三班兜兜轉轉就係無功而還，轉過去跑谷草但表現亦未有改善。

今次用番贏馬拍檔潘頓，加上回降四班，講鬥志毋須懷疑，而1,200磅大馬唔會怕孭重磅作賽，每一瓣條件都同上季初差唔多，睇嚟可以複製番當時狀況，贏番一場。

-------------------------------
想唔想知自己財運、事業、愛情會點？參加《玄機解馬》節目，可免費畀美女堪輿學家唐碧霞睇八字、睇相指點迷津，快啲入嚟報名。
https://forms.gle/dN9hfSiFxc7T8E436
-------------------------------
馬匹賽績、騎練數據、名家貼士
【最強贏錢武器 盡在蘋果馬網】
https://hk.adai.ly/e/5nFdCiYq8Y
-----------------------------
【撐學生】
召集有心人 撐學生全年睇《蘋果》
立即按此