梅艷芳轉眼離世14年，梅迷仍不忘偶像，今日係梅姐死忌，粉絲們一如以往到梅姐位於九龍塘省善真堂嘅靈位拜祭，靈位前放有6個花牌以表思念外，更放滿多樣梅姐生前喜愛既食品，如蜂蜜蛋糕、壽司、蛋撻等，而且亦準備多紥香燭，方便前來拜祭梅姐嘅粉絲上香之用，十分細心。

下午5時許，數十名梅迷穿上黑色素服，相約到尖沙嘴星光花園阿梅嘅紀念銅像前獻花，雖然未有舉行特別嘅儀式，但係呢份心意相信阿梅已經收到。

銅像旁邊有兩個巨型花牌，係來自大陸歌迷嘅心意。來自北京嘅Ancy同梁小姐話已經鍾意咗阿梅7年，佢哋每年都會嚟悼念。讀書時代更曾經走堂嚟香港致祭，今日除咗嚟星光花園，仲會去大嶼山同埋省善真堂拜祭。佢哋話喺阿梅身上學會積極向上嘅態度：「無論交朋友還是工作，我們都用這個態度面對，而且要保持開朗的心，還要做個善良的人，能幫的就幫。」

兩位梅迷話最難忘阿梅03年嘅告別演唱會，Ancy話：「雖然當時我很小，未能到現場看，但每年我都會翻看紀錄片，她的所有電影，我們都看過，最喜歡《川島芳子》和《鍾無艷》。」

另外，梅艷芳國際歌迷會今晚聯同環環好日誌，於西環山道重溫電影《胭脂扣》，選址別具意義，因山道即如花相約十二少的地方。

主辦︰梅艷芳國際歌迷會
社區伙伴︰環環好日誌
日期︰12月30日
時間︰8:30pm - 10:15pm
地點︰西環山道天橋下 (香港大學站B2出口)