內地粉絲爭奪 四大球會
早知國內球迷瘋狂,除咗喪炒巴黎聖日耳門碧咸波衫,近年仲殺入波鞋街搶貨!「現時買波衫的球迷,超過七成係內地Fans,佢哋主要集中四大熱門球會,包括巴塞、車仔、曼聯同埋阿仙奴,導致有時供貨不足。」
阿傑話,本港球迷試過因買唔到心頭好,直接上球會官網訂衫:「雖然有時送帽、頸巾等額外贈品,但折算港元後,埋單差唔多九百蚊,貴成四嚿!然後仲要等兩、三個禮拜先收貨,好唔抵囉!」佢話,今季球衣整體供應充足,如果想買波衫支持自己球隊,趁球季未開鑼,都係早買着數。
(車路士)主場由圓領變藍白V領,純白作客亦加一條紅線點綴。
(曼聯)去季主場用黑色V領,今季換扣鈕,延續紅魔色調。
(阿仙奴)主場衫無乜改動,作客就由紫黑橫間改成純黃色,出入好大。
驚買錯老翻波衫?阿傑話,其實好多細節位要行內人先睇到,原理就好似分真假銀紙咁,好難囉!佢教路,一般球迷最容易分辨,就係印喺波衫下擺的小布:「通常老翻啲字印得好差、好唔清楚,防偽邊又唔靚;如果仲唔敢肯定,你可以直接打電話去官方熱線,讀出小布號碼及店名作核實。」
查詢:Nike (2751 4023) adidas(2149 3888)
【動主播召喚 敢你就來】
立即報名: http://anchor.nextmedia.com