在2014年雨傘運動期間，以「手臂延伸」警棍襲擊途人、被判囚3個月嘅退休警司朱經緯，舊年已經服刑完畢，今年初終極上訴失敗後，久未露面。有西環街坊今日（24日）就向八方報料，話今朝喺當區一間茶餐廳，發現疑似咬緊長糧嘅朱經緯，喺茶餐廳「快閃」飲茶、嘆多士。

有住喺西環多年嘅街坊向八方報料，話今朝喺加多近街1間茶餐廳，見到疑似朱經緯，指當時一身街坊look嘅朱，以風褸配短褲拖鞋，單拖食早餐，其間有1名身材紮實、感覺上有啲警察味嘅男性朋友現身say hi，但朱同佢都冇乜交流。呢位街坊話，以往未見過朱經緯喺西環出沒，但就引述有街坊話，曾經喺郵局見過朱經緯攞掛號信。

唔知係咪因為佢話晒都叫做半個知名人士嘞，據街坊話，朱經緯發現有其他人注視後，神情有啲閃縮，前後喺餐廳逗留咗約15分鐘就閃人。八方暫時未能聯絡到朱經緯，但據唔少認識朱經緯嘅人士確認：一定係，除非唔係！

-----------------------------
《蘋果動新聞》訂閱新世代，4月開始免費訂閱，現在接受登記！
http://bit.ly/2Ja3IXw
-----------------------------
星期一至五晚上10點半
《動腦Q》Let's Q the money！
http://bit.ly/2QW8LcI