30出頭、從事銀行業、在中環返工，3個字「中環人」，一個世人看似高收入、身光頸靚的大好青年，默默耕耘十多年，只是想上車而已，卻抽新樓多年食白果。2年前終於得償所願，以約320萬元買入麗新（488）旺角逸新一個實用182方呎劏房，「我覺得有啲無奈，大嘅單位太貴，細單位雖然負擔到但好細……但無辦法，所以逼住買呢啲咁細嘅單位，亦都係因為點解而家市面咁多細單位。」居屋不符合資格，新樓抽不到，真正夾心階層，5年來租樓都花去超過60萬元。

作為中環人，他坦言：「都係打份工。」但時間不但是金錢，更不由自主，工時長、壓力大，已無空閒睇二手樓，「二手樓要睇，單位有租客又睇唔到樓，唔知單位有無問題。新樓簡單好多，睇啱個則、價錢就可以決定。一直就好想快啲抽到，所以其實納米樓都有好處，就係畀人容易上車。如果唔係我就一路租租租，蝕晒啲租金。」

2年前旺角逸新開賣，「地點方便，銀碼又細，而家要銀碼細又係市區，真係無選擇」，而他覺得供樓好過租樓，「香港樓價一路都好貴，好難買大單位上車，見到有細單位，上咗車先啦。大部份人只能夠住好細嘅單位，除非你肯住遠啲。」於是他斥資逾320萬元買入項目低層單位，實用182方呎，呎價約1.76萬元。

投身社會十多年，最終首次置業買劏房，他雙手緊握放於肚前說：「我覺得有啲無奈，大嘅單位太貴，細單位雖然負擔到，但好細，呢個單位可能要擺晒我想擺嘅傢俬都未必擺得落，但係又無辦法，所以就逼住要買呢啲咁細嘅單位，亦都係因為點解而家市面有咁多細單位。」等了兩年終於收樓，第一個感覺：「182方呎，一個人住都可以。但實際比想像中細咗啲，住逼啲囉，無辦法。我都想買大啲，但呢個樓盤1房已賣到500幾萬。所以住住先囉，第日先換大啲單位。（單位一定升值？）好難講，而家都驚跌，但自住都OK，跌少少OK，唔會大跌啩！」

單位雖小，但始終租緊樓，總好過交租幫別人供樓，家人女友都知他買劏房，女友就未現場睇過，「我諗女友唔會嫌棄嘅，買到細嘅，之後換層大，一步一步來。有樓都唔錯啦，好多人仲努力緊。咁我都會努力，希望可以換間大啲嘅屋。」

記者：陳家雄、張嘉鎣

採訪：陳家雄、張嘉鎣
編撰、旁白：張嘉鎣
攝影：細釗
剪接、後期：東尼
編審：楊智佳