當年今日
關於我們

【短片】【願做《大時代》電影監製】杜琪峯:今時今日啲劇算乜嘢,實死0架!

蘋果日報 2015/04/22 06:00

蘋果生日青雲跑馬地大時代即時電影版生日日1行日

今晚應邀到跑馬地Amigo餐廳出席杜琪峯60歲生日派對嘅《大時代》人物,除咗有方展博同龍紀文:劉青雲同郭藹明之外,仲有方展博爸爸方進新——松哥劉松仁。

青雲頭先被問及有指無綫擬開拍《大時代》電影版一事,問佢會否接拍,佢都係話:「到時先算啦,係真先講。」郭藹明直頭擰晒頭拒絕夫妻檔上陣,劉松仁就話:「都唔知係唔係,(會否考慮拍?)睇下角色先再考慮啦。」講到話fb廣傳佢喺《大時代》一場跪求老闆唔好炒佢嘅戲演技神級,松哥笑笑口話:「依家先至讚?死得啦。」唔係0架唔係0架,廿幾年前已經好多人讚,但當時冇fb嘛,依家反而仲吸納埋一班90後觀眾,讚上加讚添啦。

方進新父子對大台拍《大時代》電影版似乎唔太上心,反而今日主角杜Sir就好認真。約7點半左右,手執一杯靚紅酒嘅杜Sir由餐廳出嚟同大家打招呼,生日願望方面,佢話:「對面就係馬場,希望場場都贏。身邊嘅親戚朋友都身體健康開開心心。」又表示朋友折現捐錢去慈善機構,作為杜Sir嘅生日禮物。

好喇,講《大時代》。杜Sir話:「呢套劇集撼動人心,(拍電影版?)呢個要問番韋家輝,真係好好睇。」咁杜Sir不如落場做埋監製啦,佢就爽快地謂:「冇所謂,呢套劇好代表香港,係80年代全盛時代嘅電視劇,風靡全球,唔好話我踩依家啲劇唔好睇,今時今日啲劇算乜嘢,實死0架,唉,我生日都係唔好講咁多!」