八方噚日趁遊行就落地問吓遊行人士心聲，發現兩人真係叮噹馬頭。教書先生相信都係正氣派，八方咁啱問咗兩位老師，不約而同都點名大讚6.12當日喺佔區領奔走、保護學生時一度虛脫暈倒嘅鄺神，張Sir特別欣賞鄺神可以穩定群眾，邱Sir則讚鄺神喺前線做好多嘢，佢仲知道以前人哋只係叫鄺俊宇做鄺仔，𠵱家已經升格做「鄺神」㖭。
楊岳橋當然都唔係省油燈，而佢女性緣非常強。學生譚小姐最有印象就係岳少，話岳少成日喺YouTube拍片，例如遊行完會講解返當日情況，表現唔錯。做文職嘅盧小姐就好欣賞岳少講嘢好有理據，例如強調處理台灣殺人案同「送中」，唔應該混為一談，但盧小姐亦都對鄺神與市民同行、保護示威者嘅表現有好好嘅印象，可見鄺神唔只得男粉絲。
而喺岳少、鄺神以外，有唔少民主派議員嘅表現都好突出，好似民主黨主席胡志偉6.12衝突現場以肉身擋住警方向年輕人推進，高呼「我要見指揮官！」兼硬食催淚彈一幕，亦令邱Sir同埋做建築嘅朱小姐印象難忘。
李八方