住喺山頂嘅朋友，呢排應該不時見到自由黨楊哲安（Jeremy）喺麥當勞道揮手，細個住過山頂嘅Jeremy近排重返舊地，唔知係咪為中西區補選做好準備，但就因此重遇聖保羅男女小學嘅舊同學，憶當年讀書往事，41歲Jeremy自爆留英時匿喺被竇苦讀辛酸史，成績終由幾乎包尾變5科A。
咪以為太太係前藝人張新悅嘅Jeremy，做過教育局政治助理，一定係讀書人，小四成績表班主任評語係「成績稍弱」噃，「哈哈哈，我細個不知幾奀皮，書就唔多讀」；Penmanship同書法都係丙+，佢直認手字好差，阿哥都笑佢啲字中英文都似雞腸。

細個中文差過菲籍同學

1986年10歲仔，因為爸爸、即係前立法會議員楊孝華被調派至北京，成家人北上移居，Jeremy話當時成班得3個同學，「中文同英文都唔夠菲律賓同孟加拉嘅女同學好，真係好瘀皮」。
13歲時爸爸調返香港，佢同哥哥一齊赴英讀書，Jeremy話當時英文好差，「例如我係會講：I don't know you say what」，近160人考第100零幾，唔衰得下發憤圖強，寄宿學校規定好早熄燈瞓覺，佢就挑燈匿入被竇夜讀，結果成績漸佳，亦由唔戴眼鏡變埋四眼仔。拎住5條A考入牛津讀經濟，其後仲成為倫敦政治經濟學院理學碩士。
16歲幫過爸爸助選嘅Jeremy，入完政府再選過區議會，佢話政治其實好重要，希望更多人關心社會。