今次何韻詩呢個演唱會，冇任何贊助、財團支持，亦冇任何資金，所以每位扲荷包買飛入場嘅觀眾都好重要。阿詩喺獻唱《木紋》時，亦感謂:「感激觀眾嚟睇騷支持。」台下即報以熱烈拍掌。

阿詩續道:「走到呢步真係唔容易，但我選擇咗行呢條路，因為我相信香港人。」此時觀眾大叫:「撐住呀，唔好喊！」有歌迷在台上溫馨遞上愛心紙巾，阿詩即笑道:「做乜啫！我都冇喊！」

之後阿詩繼續講:「其實呢條路真係唔易行，鍾意香港嘅人，喺呢段時間都會見到好多奇形怪狀嘅事發生，每日都唔知道要嬲幾多次。睇報道時，真係覺得鬧又唔係，唔鬧又唔係。但有啲嘢，為咗自己成長嘅地方，真係要堅守。我會用盡所有方法去努力。」

「今次個唱帶出嘅訊息係有啲大，但我相信入嚟睇嘅現場觀眾嘅質素，所以我用唔同嘅方式表達。其實喺我嘅音樂團隊中，都有好多喺呢行好多年嘅人，可能都厭倦一直以來做嘅方式，一啲規則，一啲既定嘅嘢，睇下可否打破呢啲方式，原來真係可以做到。但一定有唔同代價，不過，如果揀番同一條路，可能都係要付出代價嘅。」

「但我會做自己相信嘅事，前面嘅路唔知點，雖然我天生都有樂觀嘅因子，但我都唔敢太樂觀。喺依家呢個世界入面，如果相信團結，可以好似以下一首歌歌詞(《美空雲雀》)，就算天空穿咗一個窿，有邊個可以信服？嗰個就係你自己。」