求驗客手記:後腳十二碼王無恥照落場 - 求驗客

蘋果日報 2011/07/25 00:00


阿聯酋中場阿圭拿喺上個禮拜日友賽黎巴嫩場波,用後腳射入12碼後,段片喺網上瘋傳。輿論普遍認同佢唔尊重對手、無恥,而佢亦知衰,公開認錯。據講阿聯酋決定作出內部處分,但罰還罰,前日對印度場世盃外一樣有佢(圖中)份,佢喺下半場中後段上陣。件事搞到咁大,估唔到阿聯酋依然派佢落場,所謂處分似乎阻嚇性欠奉囉。講番場波,阿聯酋大炒最後只剩9個人嘅印度3:0,其中印度曾為門將保羅被逐投訴,令比賽一度停頓幾分鐘,睇嚟阿聯酋嘅比賽真係特別多事故。