四川地震，失去咗好多生命，亦出現好多英雄，滙豐（005）成都分行員工就係其中一班值得華華salute嘅真英雄。
話說，地震之後，滙豐成都員工雖然撤離分行，但全部喺公司附近空地留守，以防有人乘亂走入銀行，又有員工幾近捨身保護分行文件同客人資料，以免喺地震中流失，滙豐內部後嚟發嘉許信，表揚呢班公司英雄。嘉許信度提及，喺一次強度達6.1級嘅餘震發生時，分區經理、分行經理同啲職員應人行要求，完成一項結算交易，不惜闖入搖搖欲墜嘅分行，完成任務。

自製臨時辦公室

嘉許信仲特別點名讚揚幾位員工，就好似IT部一位員工BobLiu，喺地震發生後，即時用自己嘅手機同內地總部報告，之後無懼生命威脅，走入分行挽救啲載有重要資料嘅磁帶，又將所有電源閂晒，確保電腦冇事。跟住呢位仁兄確定自己老婆冇事返咗屋企之後，走返公司附近空地，同自己組員留守過夜。咁仲唔止，Bob喺餘震發生後知道父母間屋塌咗，但仍堅持唔離開，仲話做得幾多就幾多。絕對係地震中感人故事。
一位新加入嘅同事Jon雖然被電親，但佢同其他同事繼續嘗試聯繫總部，直至大廈管理員強迫佢哋先肯離開，個個擸埋辦公室器材去分行經理屋企設立臨時辦公室，繼續提供服務。
華華相信呢班員工，係滙豐喺中國最寶貴嘅資產。
電郵：mailto:[email protected]