人稱「崔Big瓜」嘅崔碧珈（Anita）早前不敵「寸嘴Barbie」夏尉喻，未能殺入周星馳執導電影《美人魚》選拔13強，令唔少人跌眼鏡。

不過，崔Big瓜嘅36E木瓜巨乳身材，自然有人識欣賞，早前佢獲廣告商垂青，搵佢同「YouTube人氣王」Ming仔拍咗一個男士洗臉膏網上廣告，類似微電影有晒劇情。故事話Ming仔想追女仔，但初次同Anita喺餐廳約會已經好失禮，成塊面油淋淋咁……之後嘅劇情就要等月中播嘅網上足本版先睇到。

廣告裏面，Anita着咗一條大V領湖水綠色短裙，以4吋長事業線吸睛，佢日前喺電話度話自己平時同男仔約會都會咁着，佢話：「呢條裙係我自己嘅，現實中如果第一次dating（約會）都會着靚啲，想留一個深刻印象畀對方。」怕唔怕對方受唔住引誘？佢話：「唔會，咁先會有下一次嘛。」Anita話試過同滿面油光同暗瘡嘅男仔約會，佢話見到有少少驚，奉勸追求者要注意儀容。