日本過氣女歌手八反安未果曾以SPEED師妹身份備受力捧，1999年推出單曲《SHOOTING STAR》大賣18.3萬張，可惜只係曇花一現，同年攞完《日本唱片大賞》嘅新人獎後，星途未見順利，就算轉行性感都難救歌唱事業。

已經36歲嘅八反安未果喺2007年離開歌壇，近年轉行做食品公司Oceanfood社長，喺飲食界發展，佢後來又開設夏威夷咖啡店NaniNani，有指店舖營業額每年達至8,000萬日圓（約552萬港元），更不時以生意人身份亮相節目受訪。噚日，八反安未果透過Ig忽然報喜，原來佢揀正母親生日同老公註冊，並上載一張手拖手照片，雖然新娘子手上戴上結婚鑽戒，但似乎都唔及其手上青筋搶眼。