四四正正、無特別口味的白方包，一向都演開平凡人戲路，唔係做三文治就係西多士，最花巧都只係變成炸蝦多士。不過白方包雖然普通，但勝在可塑性高，搓圓壓扁點都得，今次麵包迷阿珊決定將方包化身為中式點心，除了扮餃子同煎餅，竟然連叉燒包都扮埋！方包原來都可以咁鬼馬？今次真係大開眼界！
記者：謝翠玲
攝影：伍慶泉
示範：大窩口讀者阿珊

麵包狂無包不歡

愛吃麵包的阿珊，可以一日不吃飯，卻不可以一日無包食！無論是方包、法國長條包，就連硬邦邦的大麥包，都逃不過阿珊的手指罅。有次她跟朋友去吃意大利菜，見到桌上任吃的麵包便不停點油醋汁狂食，搞到主菜未上，已經捧着肚皮叫飽飽，被朋友取笑她「嘥料」！

方包可塑性高

日食夜食，阿珊對各種麵包的質感、味道都瞭如指掌，更發現本身味道純樸簡單的白方包，其實非常適合用來做不同口味的點心，無論是新鮮焗好的鬆軟方包，又抑或是已放了兩天帶點硬身的方包，以至麵包皮都好有用。阿珊娓娓道來做方包點心的心得：「好似今次我整的幾種點心，整餃子最好用新鮮麵包，鬆軟的包炸起會更酥脆；叉燒包因為要用微波爐加熱，用放了一天較硬身的方包都無所謂。至於煎餅！用番剩餘的方包皮來泡水做那方包麵糊都一樣好味，而且可以不浪費！」

扮嘢1號　叉燒包汁多餡滿

價錢：$15/6個
需時：20分鐘

材料：

方包6片（切邊留用）、叉燒肉200公克（切粗粒）

調味汁：

糖1茶匙、蠔油3湯匙、水8湯匙、生粉1茶匙

1.製叉燒餡

將調味汁倒入鍋中，加叉燒粒煮至濃稠，放涼備用。

2.切麵包

方包四邊以放射線形式切8刀，加餡料，沿摺痕包起。

3.微波爐叮

扭實墊底保鮮紙固定形狀，底部刺透氣孔。封口朝下，微波爐低溫加熱50秒即可。

扮嘢2號　咖喱雞餃子外脆內香口

價錢：$20/8隻
需時：20分鐘

材料：

方包8片、雞髀肉1塊、急凍雜豆1碗、咖喱粉3茶匙、蛋1隻

醃料：

豉油、酒、生粉各適量

1.做餡料

雞肉切丁醃味，同雜豆咖喱粉炒香，攤涼放在方包（壓薄剪圓形）上。

2.包餃子

將加入餡料的方包對摺成半圓，以蛋汁封口，用叉壓實邊。

3.猛火炸

燒熱油，將方包餃子炸成兩面金黃即可。

扮嘢3號　魷魚葱燒餅味似蘿蔔糕！

價錢：$8/2塊
需時：15分鐘

材料：

麵包皮100克、小魷魚2隻、葱2條、蛋1隻、紫菜1包、甘笋1/4條、水1/3杯、豉油、鹽及胡椒粉適量

1.泡漲麵包

麵包皮撕細放碗中，加水充份泡漲，再與蛋拌勻。

2.拌勻材料

魷魚、葱、甘笋切碎同麵包糊拌勻，加鹽和胡椒調味。

3.熱鑊煎香

燒熱平底鑊，煎至兩邊金黃，淋上豉油和撒紫菜絲。

儲存麵包小貼士

用不完的方包，可以逐塊以保鮮紙包好，放在保鮮密實袋中，並於冰格內儲存；臨食前才放回室溫或直接放入多士焗爐中烘烤，便可回復鬆軟。麵包放冰格可保存4周。