許智峯同傳媒茶敍時話，近年政府派狗仔隊嘅做法比過去明目張膽，除咗廁所唔見狗仔隊之外，現時喺全部電梯出入口，甚至中信天橋都有「狗仔」駐守，好似CID咁唔聲唔聲記錄議員出入情況，令唔少議員感到不被尊重同唔舒服，好多時想離開立法會處理事務，都因狗仔隊報料，政府高官即來電施壓唔畀議員行開，影響唔少立會投票結果，亦有行政干預立法之嫌。
咁政府狗仔隊有冇向立會交代過，佢哋具體工作係乜？許智峯話問過立會保安組，知唔知呢班狗仔隊入立會目的，但保安組都話唔知佢地入嚟做乜，只話秘書處收到政府提供名單，就會出證畀佢地出入立法會，令許智峯覺得政府做法好唔合理，因為議員助理出入立法會不同層數時，都受到嚴格限制，為乜狗仔隊唔使？
由於許智峯認為「狗仔隊」收集嘅資料涉及議員私隱，屬私隱條例監管，有責任解釋資料如何處理同使用，民主黨7名立會議員經黨團會議後，決定就狗仔隊一事去信政務司司長張建宗，要求解釋取得的議員私隱資料會點用，若然解釋唔清楚，佢將會向私隱專員公署正式投訴。
李八方