吳雨霏（Kary）、許志安和蔡卓妍（阿Sa）等歌手噚晚喺灣仔會展出席新城音樂會，情傷後首復出嘅Kary頂替病咗嘅G.E.M.唱壓軸，有傳佢首新歌《今夜煙花燦爛》係憑歌寄意，Kary話：「你覺得呢首歌講復合咩？只係話未分開前嘅美好回憶。」

之前佢同樂仔去旅行用情侶篋，依家分咗手，個篋點處理？Kary話：「屋企收埋咗，去旅行先算，可能到時買新呢。」佢否認樂仔曾求婚同患抑鬱症。另外又有指佢整容箍煲，Kary話：「呢個話題講咗20幾年，好悶，冇話接唔接受（整容），開心咪整，呢啲係個人喜好。」

阿Sa就承認返內地探男友陳偉霆班，咁係咪同房？佢笑言：「你哋話呢？唔使講得咁清晰啦！」