勤+緣（2366）公佈嘅數據信息，靚靚仔仔，股價仲挨近3年低位，殘得冇理。勤+緣主打祖國媒體、電視及廣告業。喺月頭，集團公佈話上年尾開始營運嘅新華社LED廣告代理權，喺淡季中，12月單月廣告收入已經上到1100萬銀人仔，兼有信心今年戶外廣告收入會過億銀。又由上年12月到今年頭，勤+緣已簽訂廣告金額，達到全年目標40%。呢批數據，已經好靚仔。
仲要咁睇，隨住阿爺谷內需政策進一步到位，勤+緣今年核心業務，繼續肥仔，2010年度業績，照計谷底大反彈。唔好計多，勤+緣本年度純利上番07年度1.4億銀水位，預期PE都係得7倍幾單位數，ChinaPlay兼仲單位數PE，吸引到痹。博勤+緣翻半番到2.27元，預期PE都係講緊得11倍多。

華藝鑊氣逼人

華藝礦業（559）上星期二上億股成交，鑊氣逼人，趁旺場，華藝有得諗。上星期智利地震，銅價急飆咗轉，連帶銅相關業務股份都落鑊短炒。但要咁睇，其實由上年下半年以嚟，商品資源價格已經回升兼回穩，相信華藝主打銅桿業務，受惠呢項因素，可以帶動番2010年度業績復蘇。呢轉短打，博華藝升20%到0.23元，目標價未有耐上到供股後NAV0.30元。
錢雋