好多朋友都話年尾要大事回顧一下。2018有咩好、唔好，做到、做唔到？似乎都係失落居多，可能相關朋友對自己要求高，我未係咩成功人士，仲俾人嫌我得過且過，但係呢種心態無乜壓力，輕鬆自在又一日。

總結，我今年過得算幾好，間中仲中吓馬仔，又可以加餸。如果淨係拎呢度呢三個月寫嘅馬去買，粗略計有過半數上名，部份W，扣埋本，應該都仲未負數。加埋臨場見好會加注嘛！

我自己個荷包就收貨啦！大家唔好嫌我無乜大志，本身我就係一條hea友。不過揀馬並唔hea。熱要夠穩，邊線要有機。如果畀你哋投訴我命中率太低，總編都應該唔會畀我過到年。而且，我都會用真錢買嘛！最忌貼嗰啲跑咗四四五五，佢有獎金又唔關我事嘅，然後下次又好熱。唔使你哋嬲我，我自己已經超憎自己。

今日頭場隻「君悅灣」都係呢家嘢，好在佢尚算有啲分頭。同場喺季內識上名嘅泥地馬唔多，佢係嗰啲有欄順放，就會有機嘅老馬。佢算幾fit，我支持吓先，希望我都食個尾糊。腳拖「王者再現」同「架勢」。祝大家好運。