香港馬圈有兩部贏馬機器，其中之一莫雷拉在今午（13日）沙田日馬停賽缺陣，另外一部潘頓則於第五場四班草地1200米，勝出葉楚航馬房次熱門「精益求精」，從而連續贏到第13次賽事，勁創個人近年一項新紀錄。「精益求精」今場單Win及組合獨贏A2分別派39.5及24.5元。

三歲澳洲自購新馬「精益求精」，上仗服役初出配潘頓後上輕勝四班田草1000米直路賽，今次加程跑長200米，班次及配搭照舊，沿途居中前位置，結果無驚無再下一城，負133頂磅仍勝1.25馬位，從而保持兩次出賽不敗之身，前途可謂一片光明。

潘頓連續13個賽日贏馬後，季內增至剛好半百場50頭馬，但仍落後雷神八場排第二，爭霸形勢處於下風。

至於葉楚航踏入新一年枕住贏日賽，1月1日贏一場，1月7日起孖，今日亦已開糊，反而剛周三（10日）夜賽就冇馬贏。

第五場二至四名順序為半熱門「好叻仔」、冷馬「慣勝積極」及大冷門「陽光」，四重彩派15萬7千幾。