今早大家睇《娛果》fb live，目擊通利職員疑「放生」排喺綠色箭嘴前嘅南亞裔人士上樓買飛，有自稱來自福建嘅大學嘅大陸男子怒轟不公，一名戴黑色口罩嘅香港五迷Kelvin都睇唔過眼，投訴表示好憤怒，強調南亞唔係喺隊入面（即綠色箭嘴後先至係隊入面），但通利工作人員依然畀佢哋入，佢話事後會投訴。

爭論期間，有無綫主播幫排綠色箭咀位嘅人話有問題，然後個職員話：「你唔係排隊嘅，唔好出聲。」

搞到下午三點，Kelvin終於出番嚟，仲買到心水飛——最貴飛，買到四張：「我同啲朋友會寫意見書，因為覺得通利做法好差，唔關買唔買到飛嘅事，同一個職員半個鐘講嘅嘢都有矛盾，死下機又賣下，喺上面都等咗成粒鐘。」實名登記好唔好？他即謂：「好呀！」

至於網民話去ICAC投訴通利職員？Kelvin表示：「大家點做我理唔到，但係我會同朋友寫意見書俾通利。下次會轉第二間，我都買咗好多年，有6、7年買五月天飛。」

Kelvin又話：「今次係最攰嘅一次。」

截至三點，據消息指，暫時未有一場賣晒飛。至於頭先嗌無綫主播「唔好出聲」嗰位職員亦於下午三點左右再度出場，維持秩序，對傳媒追訪一概不回應。