LG近排氣勢的確一時無兩,一部G8000拍片王依然喺場中熱賣,突然間再有部G7030水貨殺到。齋睇外表,G7030與一般雙彩芒機差唔多,只係玩銀黑配搭,不過再睇清楚先發覺其與眾不同。雖然同樣採用65,000色彩芒,不過機內顏色就全部用上黑色,令彩芒更加突出,感覺相當Cool。
外芒玩反白彩字
不單止機內精采,256色外芒亦都令人有驚喜,採用罕有的反白彩色字體,可以有7種顏色任君選擇,而且更會不停由下至上轉動,十足十老虎機,最正係有星座圖睇,襯埋個全黑底,直頭好似望住個天睇星座,其他功能就有40和弦、GPRS、EMS及WAP一應俱全。現時只有水貨英文版本,未能支援中文,若果推出中文行貨相信必成為大熱彩芒摺機。
記者、攝影:劉耀祥