梁朝偉噚晚喺上海參加咗一個由大陸雜誌主辦晚宴，梁朝偉獲頒「亞洲卓別林大獎」，以表揚其藝術成就獎，佢更親自到場領取獎項。偉仔今次得獎攞得特別開心，因為佢老婆劉嘉玲很貼心咁專門安排老公嘅一班老朋友如梁家輝夫婦、鍾鎮濤夫婦、邱淑貞、杜德偉夫婦、陳國熹、上山詩鈉等飛去上海賀偉仔得獎，俾個意外驚喜佢，當佢到場發現自己一班好友紛紛出現，真係既意外又開心。

呢個獎自1972年創立以嚟第一次嚟到亞洲，作為第一個亞洲藝人得到呢個藝術成就獎嘅梁朝偉，噚晚喺已故喜劇大師差利卓別靈（Charlie Chaplin）嘅孫女Kiera Chaplin手上得到此榮耀，心情特別興奮，偉仔話：「差利卓別靈係我好細個時，心目中已覺得佢係好偉大嘅表演藝術家，今次可以喺佢個孫女手中接過呢個獎，當然係好榮幸。」

問到嘉玲係咪好戥老公開心？佢話：「當然係與有榮焉啦！我知偉仔都好開心，因為咁多好朋友特別飛過嚟同佢慶祝，所以噚晚佢係好難得喺一個慈善晚宴坐足一晚。」

至於鄧紫棋（G.E.M.）就獲頒跨界創新人物大獎，佢男友Mark都陪埋佢出席頒獎禮，分享佢呢份喜悅，兩個人喺會場表現好甜蜜。

精選娛聞，喺晒《娛果》
http://fb.com/appledailyent