英格蘭足總盃賽以前被稱「爆冷溫床」，皆因各級球隊水準接近，加上球員肯搏命，淘汰賽制賽果亦往往出人意表，故此才成為最能吸引球迷地方盃賽。但係自從英超迅速發展，爆冷買少見少，8強階段，英冠球隊絕無僅有。足證若能企穩英超一席，確係實力象徵。
隨住英超起飛，呢個頂級聯賽同英冠之間就漸產生鴻溝，當中有隊波呢三、四年就跌正落呢個罅位唔上唔落，講緊嘅就係新特蘭喇！兩年前試過以英冠超班實力升上英超，上屆就以差絕歐洲4大聯賽嘅19分包尾成績降班，可以話係企穩兩個級別分水嶺。
今季球會銳意大展拳腳，點知成績反而更嚇人，開「咧」4場全輸；之後即刻搵堅尼過嚟做領隊，佢仲一口氣簽多6名有質素球員，效果快過打針，最近連贏兩場，一於繼續追住買！聽晚新特蘭會作客到少休一日兼近排聯賽表現麻麻嘅列斯聯，受讓平/半抵捧。

歐冠開鑼捧國米

講到今晚歐冠盃重心，就一定要數國際米蘭。過去三屆分組賽首日均能贏波而回，共入6球零失球，為各強隊中最好。除有數據支持外，國米現時人腳質素極高，士砵亭呢類歐洲二、三線球隊，難有偷雞機會。加上士砵亭上屆歐洲賽表現差勁，今場難逃再敗命運。正所謂：「放心捧國米，開飯冇閉翳」啦！
強尼
有線球彩台主持
電郵：[email protected]
phone波熱線：1831678