韓國女神全智賢同「長腿Oppa」李敏鎬主演嘅SBS新劇《藍海傳說》今晚播出第六集，承接上一集講到全智賢飾演嘅美人魚沈清原定約咗李敏鎬飾演嘅天才騙子許俊在喺南山塔見面，但全智賢因為遇到車禍，令李敏鎬白白喺南山塔空等全智賢。

今集一開始繼續回到古代，世華（全智賢古代身份）被人追捕，金聃齡（李敏鎬古代身份）派人保護全智賢，但最後李敏鎬發現唔見全智賢影蹤，十分擔憂。鏡頭一轉回到現代，同樣等候全智賢嘅李敏鎬得知全智賢出生車禍，即刻周圍搵全智賢。

李敏鎬終於搵到全智賢，發現全智賢體溫只得29度，心跳更一度停頓，令李敏鎬甚為傷心，即時捉住全智賢嘅手，而此時全智賢就醒來，同李敏鎬講：「我剛做夢，你抓住我嘅手，救了我。」

全智賢醒過來個樣勁冧，勁開心李敏鎬擔心自己。而李敏鎬亦喺醫院見到自己冇血緣嘅哥哥李知勳，李敏鎬問係唔係哥哥撞全智賢，跟住就回到佢哋兩兄弟年少時，原來佢哋曾因誤會結下恩怨，兩兄弟更大打出手。

全智賢要留院，點知因為要禁食，或有機會做手術，搞到全智賢冇嘢食，全智賢即打電話向李敏鎬哭訴，李敏鎬即打電話到醫院投訴，令全智賢終於有嘢食。李敏鎬仲來醫院偷睇全智賢，見到全智賢有麵食仲暗暗開心，李敏鎬都奇怪點解自己會咁。

申惠善問李熙俊到底全智賢係邊個，亦對佢身份好奇怪，覺得佢可以遇車禍可以咁快復元。而全智賢喺醫院見到院長欺負向醫院追討賠償嘅女人，而對方更係失去女兒嘅人，全智賢即時忍唔住怒氣起飛腳踢咗對方一腳。

全智賢仲同該名女人傾計，問佢想唔想刪除女兒嘅記憶，如果想全智賢就可以幫佢，不過嗰名女人即使好痛苦但唔想忘記女兒，因為女兒係自己家人，寧願帶住痛苦也要記住佢。李敏鎬得知全智賢鬧事，再次化身做騙子對付嗰名院長，最終成功令全智賢冇事，同時亦都幫埋嗰名失去女兒嘅母親。

李敏鎬接全智賢回家，全智賢問初雪幾時來，李敏鎬話初雪只能來一次，要到下年先來。全智賢問係唔係要記住難過嘅事情，李敏鎬又再湧起一個女人同佢講「我愛你」嘅聲音，同時亦話會帶全智賢去其他地方睇初雪。兩人去到滑雪場，全智賢穿上滑雪裝即時女神上身，唔少男仔都撩佢，李敏鎬即時帶走佢，點知全智賢一口氣就衝落雪地，全智賢只識滑唔識停，最終同李敏鎬來個熊抱抱，兩人跌咗落雪地，仲情深對望，好鬼sweet。