36歲嘅李日朗，2010年北上發展，2016年先至回港，更由李逸朗改名做李日朗，李日朗坦言大陸市場仍為首要目標，佢話：「每日變化都好大，佢哋策略又會變，又或者觀眾口味突然間變，我要盡快知道先可以調整。」講到大陸對於港人北上拍戲嘅條文收窄，跟「小鮮肉」比下去，李日朗直認競爭好大：「04至05年，我仲係『小鮮肉』，當時就好興好man嘅男士，於是就恨自己man唔到，到我慢慢老化，市場又鍾意番啲後生，早知我食多啲維他命頂一頂啦，冇辦法，時代係咁，不過我唔認老，我保持住一個後生嘅特色，就係貪玩。」

早前李日朗自資拍網絡電影《神探茄喱啡》，佢認為呢個係轉捩點：「呢部係同朋友一齊合資，我唔係搵夠，諗番起，台前幕後都收友情價，估唔到效果咁好，幾日就已經超過500幾萬點擊。」李日朗指全球開始網絡化，生活得好急，入戲院睇戲越嚟越少，大部份人習慣咗用手機睇電影，再唔係以前咁安安定定坐喺屋企睇，佢話：「我開咗4部網絡電影，好幸運，最後一部可以上到院線，我好感謝身邊嘅人。」

其實驟眼睇，李日朗似乎跟以前冇乜點變，佢即刻話：「唔係㗎，o依家通宵做一晚嘢，我會好攰，以前唔係咁，以前嘅我仲可以跑步、打籃球，前排我參加一個小型籃球比賽，撞傷左邊大髀，我竟然要抖兩個禮拜，以前傷咗，只係抖4、5日，慢步做warm up就ok。」

前同門師兄弟關智斌（Kenny）、陳偉霆（William）喺大陸發展得好好，會唔會互相比較？李日朗話：「冇得比，William喺中國大陸好紅，Kenny都好犀利，Kenny同我未入行就已經識，我哋一齊做兼職模特兒，當時我哋唔係好高嘅男仔，堪稱係矮，我哋搵job係好難，William未入行前，跳舞跳咗好多年，佢當時好瘦，好似火柴人，經過好多努力，佢先變得咁大隻，所以O依家見到佢哋咁，我好戥佢哋開心，我都好幸運，去到一個新嘅里程碑，就係做幕後嘅電影工作，我覺得OK。」

今年，李日朗簽約林熹瞳公司為旗下藝人，佢話：「我哋都係基督徒，有次佢同我傾，佢好想喺娛樂圈做多啲侍奉，完成好多好人嘅夢想，佢好有誠意，我想試下合作。」佢透露有個製作坊搵佢，想開拍一部悲劇，佢話：「人哋邀請我做導演，係一個新嘗試。」點解搵李日朗寫悲劇，係咪聽咗佢唱嘅《傻女》﹖佢即刻笑住話：「我諗唔關事，可能因為我拍咗4部戲，我寫緊一個小朋友搵媽咪嘅尋親故事，我想以一個大陸人嘅眼去睇O依家嘅香港。」

場地：The AIR（The ONE）

精選娛聞，喺晒《娛果》
http://fb.com/appledailyent