衣物手袋,冒牌貨唔會傷害用家,還可以容忍,最憎嘅就係造假藥、賣假藥,呢種人可以話傷天害理。不顧人命、健康。就算賺到暴利,後人都冇福享㗎。
海關搜查三十八間藥店,搵到大批假藥,其中兩種——白花油、必理痛——可講係家中必備,左丁山屋企就永遠有十包八包,都唔知會唔會中咗招,為阻嚇假藥,海關應該與消委會合作。公佈賣假藥嘅藥房名單及地址,等啲街坊唔幫襯佢,呢啲資料絕對涉及公眾利益,與私隱無關。假如海關唔宣佈,實在係辜負咗市民,立法會議員——尤其是勞永樂——應該在立法會復會之後,立即提出質詢。假如政府收埋啲資料唔講,等同有意靠害市民,傳媒應該踢爆!