雖然仲差幾年先到要攞長者咭嘅65歲界線，但公民黨主席梁家傑都好關注長者生活狀況，希望社區多啲人向長者送暖。好似今日端午節假期，佢就參加咗防止虐待長者協會舉辦，招待長者一齊歡渡佳節嘅午宴。午宴喺牛頭角彩霞道嘅社企餐廳「膳心小館」舉行，佢話同老友記開開心心玩足兩粒鐘，多謝在場人士熱情招呼。

而除咗長者，傑哥特別關注在場嘅靚女店主Jodie；嘩，唔怕袋巾嫂呷醋扭耳仔咩？確實又唔怕，皆因傑哥對Jodie「另眼相看」，只係源於對方嘅善心。佢話Jodie每日都為區內獨居長者送飯，名副其實係「善心人」，而Jodie之前係喺九龍城裁判法院小食部經營「簡單小廚」時，已經同社福機構合作向長者派飯，但早前佢不敵大財團，中唔到標令小廚無奈要結業。傑哥直言替Jodie唔抵，希望社會對呢啲善心人多加支持。