【李八方online】以教育panel主席身份去信八大促除標語惹不滿 葉劉死撐毋須諮詢
蘋果日報 2020/03/03 17:18
葉劉淑儀李八方ONLINE
新民黨主席葉劉淑儀早前以立法會教育事務委員會主席嘅身份，去信八大校長，指收到兩位外籍教授來信，不滿校園處處有政治宣傳海報等，故建議各大學就武漢肺炎清潔校園時，可連同各陣營嘅政治標語一併清理。代表教育界嘅立法會議員葉建源去信葉劉表達不滿，話清除校園政治海報、標語呢件事，從來沒有喺立法會嘅教育事務委員會討論過，葉劉咁樣去信八大，會畀人覺得呢個係委員會嘅共識，所以覺得葉劉此舉唔係幾好。
葉劉喎，大家唔知佢咩性格？梗係唔鍾意俾人捉住嚟話啦，所以佢今日覆信葉建源，話覺得呢件事唔使諮詢議員，因為佢覺得校園冇咗呢類冒犯性嘅政治宣傳，應該係校方管理層嘅決定，葉劉繼而打蛇隨棍上，話若然葉建源認為八大校園內嘅冒犯性政治宣傳品係值得召開委員會討論，佢就唔介意搵日開個會，詳細咁畀委員會討論啦。似乎葉劉都想製造多啲機會，畀自己喺公開平台發表「偉論」喎。
《果GYM》隨身播 健身壹App過！