當年今日
關於我們

新車巡禮:
2002年日本新車預展

蘋果日報 2002/01/01 00:00


今日係2002年嘅第一日,相信有好多車迷都想知道,嚟緊新一年會有甚麼新車款推出;而今日我哋就特別為大家,揀選咗部分將於今年內有機會在港推出嘅日本新車,並為大家作個介紹,好等車迷留有一個印象之餘,重可以揀定自己嘅心水車款。
記者:鄭達基
極品NSX
預計到港日期:2002年4月
估計售價:約130萬起
有乜吸引:一眾車迷期待已久嘅新款極品NSX,經已喺去年12月於日本正式推出,據聞香港代理亦會於今年內按訂單數目而將之引入;新車外表變動雖不大,但所配用嘅3.0及3.2公升引擎,仍能為其提供出色嘅性能表現。而於東京車展亮相嘅NSX-R強化版,亦預算於今年4月喺日本推出。
本田W.I.C
預計到港日期:2002年5月
估計售價:約12萬起
有乜吸引:剛於去年東京車展現身嘅W.I.C概念車,預計會於今年2月於日本本土推出,據聞已有不少水貨商對其感興趣;賣相酷似豐田bB嘅W.I.C,車廂配搭及設備皆吸引,而一台660cc引擎,亦能為W.I.C提供有出眾嘅性能表現。
萬事得Demio
預計到港日期:2002年11月
估計售價:約11萬起
有乜吸引:屬第2代嘅新版Demio,外形明顯較前變得圓渾有致,望落去更加似一部縮水Premacy;而車廂布局亦會作出更改,就連用作保護乘客嘅安全設施亦會有所加強.除此之外,新車將會起用一台全新設計嘅1.4公升引擎,馬力及扭力輸出仍有待廠方公布後方可確實。
萬事得Atenza
預計到港日期:2002年9月
估計售價:約港幣20萬起
有乜吸引:曾於東京車展上亮相嘅Atenza,將會於4月喺日本本土推出,而新車亦有望於9月左右抵港,但會否沿用626嘅名字,定還是Atenza則仍屬未知之數;另外暫時所知新車會起用一台全新嘅2.3公升直4偈,馬力輸出約為145匹。
豐田Harrier
預計到港日期:2002年12月
估計售價:約38萬起
有乜吸引:現時仍在熱賣中嘅豐田Harrier(即凌志RX300),為迎擊寶馬X5車系等同級對手嘅競爭,故會於嚟緊嘅11月推出全新版本;除外形有變外,新車更有機會採用一台全新嘅4.0公升V6偈作核心,配合埋現有嘅3.0公升引擎,實行給予用家有更多選擇。
豐田WiLLVC
預計到港日期:2002年9月
估計售價:約18萬起
有乜吸引:呢部WiLLVC與WiLLVi及WiLLVS相同,都係以獨特嘅賣相作號召,而車廂內嘅設備又見先進齊全,從而為用家帶來不少方便;另外,新車所配用嘅一台1.3公升直4引擎,馬力輸出有88匹。有如此配搭,相信WiLLVC定會廣受車迷歡迎。
日產Cefiro
預計到港日期:2002年11月
估計售價:約22萬起
有乜吸引:將於今年9月於日本本土推出嘅新款Cefiro,車首造型將會採用類似現有InfinitiQ45嘅設計,車廂布局及配置亦會有所改動;至於機械方面,新車將會加入一台3.5公升引擎,以迎合用家嘅需要,但屬實與否仍有待新車推出後方可作實。
日產mm
預計到港日期:2002年5月
估計售價:約11萬起
有乜吸引:剛於去年10月東京車展展出嘅日產mm概念車(據聞此車為新版March嘅概念型號),將會響2002年2月正式投產,快者可望於新車推出後不久抵港㖭;據聞新車將有多台引擎選擇,以迎合不同用家嘅需要。
日產Elgrand
預計到港日期:2002年8月
估計售價:約42萬起
有乜吸引:一向走北美車Feel路線嘅Elgrand,亦預算於今年推出新一代型號,雖然賣相大致上與現有型號相近,但較圓渾嘅車體設計,以及全新嘅車首造型,全都予人有耳目一新之感;另外有消息指出,謂新一代Elgrand會改用前輪驅動模式,以增強行車嘅操控性。
大發Copen
預計到港日期:2002年8月
估計售價:約13萬起
有乜吸引:賣相酷似奧迪TTRoadster,兼採用電摺硬頂設計嘅大發Copen,預計於今年4月喺日本推出,快者可望於下半年抵港;佢除咗嗰個電摺硬頂開關需時頗短,使用夠晒方便之餘,一台660cc直4Turbo引擎,亦能為其提供有充裕嘅動力輸出。
三菱eK.Wagon
預計到港日期:2002年6月
估計售價:約12萬起
有乜吸引:雖然代理方面未有意引入經已在日本本土推出嘅eK.Wagon,但據聞已有水貨車行打其主意;新車除賣相吸引,車廂配搭方便易用外,一台657cc直3SOHC引擎所輸出嘅動力亦見充裕,用作日常代步實在適合不過。