英國著名女歌手Jessie J噚晚來港於亞博舉行《THE R.O.S.E. Tour》演唱會，佢自從參加中國歌唱節目《歌手2018》之後知名度更上一層樓，現場所見都有唔少大陸歌迷專程捧場。演唱會於8點正準時開始，非常少有，一開場佢就著上黑色高叉舞衣，非常性感地唱出第一首歌《Think About That》，但唔知係咪返開大陸，佢用咗普通話講「你好」，似乎唔太熟悉香港係講廣東話。

Jessie J首先大讚香港歌迷夠晒大聲，又表示自己真係好鍾意唱歌，仲搞笑指：「如果你唔識啲歌詞，唔好唱。」又鼓勵放低電話，大家用對眼去睇佢表演，仲保證難忘。演唱會間佢分享咗唔少心路歷程，指自己過去幾年有段時間好唔想做音樂，成日諗人哋會點諗佢，長達3年都寫唔出一首歌。佢指自己最大嘅挑戰係健康，當9歲嘅時候就知自己有家族遺傳嘅心臟病，但就指：「我嘅弱點亦係我嘅力量，所以我仍然喺度。」仲鼓勵大家永遠唔好放棄。

之後佢換上白色西裝同銀色帽，內裡著住件性感白色束衣唱出《Not My Ex》，之後又感謝觀眾每一日都令佢夢想成真。其後佢突然即興叫咗兩個男觀眾上台合唱《Flashlight》，兩位男粉絲非常興奮，同Jessie J拖手合唱又抱抱。其後佢換上紅色長裙，發現有位前排觀眾表示朋友嚟唔到，就即場打電話俾對方唱歌俾對方聽，勁識冧粉絲。之後佢又問歌迷有無睇《歌手2018》，並表示自己參賽純粹係想挑戰自己，試下啲從來未試過嘅嘢，仲話第一集時緊張到似玩《饑餓遊戲》，之後再唱出佢參賽歌之一《Domino》。

去到尾聲，佢再換上肉色貼身衫，接連唱《Mama Knows Best》及名作《Bang Bang》，仲即時於IG開live。最後佢唱出成名作《Price Tag》，high爆全場，到大約9:50後一式完場。

精選娛聞，喺晒《娛果》
http://fb.com/appledailyent