雖然距離9月立法會換屆選舉仲有成半年,但各路有心人已經積極部署。八方更加發現,有位人兄搶閘宣佈參選,而佢表明入閘挑戰超級區議會界別,換言之,一定係區議員啦!
到底邊位咁把炮?又或者,邊位有咁多銀紙可以燒?皆因根據選舉條例,一旦宣佈參選,就要計選舉經費,但報稱獨立、被視為泛民陣營嘅沙田區議員陳國強卻冇有怕,喺fb宣佈正式參選,強調「要選就選、要打就打」!
八方問過陳國強,佢話得到約40個區議員口頭支持參選,「平時飲茶都十幾個」,當中有傘兵、新退黨聯盟、獨立及政黨人士,仲透露有人有意同他合組名單,包括政黨人士,而嗰位人士可能要退黨,但就拒透露任何一個人嘅名字。
點解咁早宣佈參選?佢自稱參選意欲大、向來唔鍾意用「積極考慮」呢啲字眼,二嚟要籌款,目標就係:380萬!咁幾時公佈名單?佢話同班兄弟有排傾㗎!
八方畀個小資料大家吖,上屆立法會超選,民建聯李慧琼用咗439萬選、民協馮檢基選舉開支則係456萬;似乎無銀彈,一切都無行。姑勿論陳國強係咪出戰,按選舉規定,由呢一刻起,佢嘅活動如涉及選舉都要計入經費並且申報咯!