明年1月嚟香港紅館舉行演唱會嘅台灣天王周杰倫，暫時會開六場演唱會，門票昨早開始公開發售，但開售廿分鐘已經賣晒，好多網民就喊晒話買唔到飛。

睇番今次周董喺香港開嘅演唱會，只係開三面台，觀眾位就已經少啲，公開發售嘅門票仲要唔夠四分一，一票難求。對比起最近幾個喺紅館開嘅演唱會，好似上月喺紅館開演唱嘅「坤哥」吳業坤，佢嘅座位表堪稱「黑洞」，開售量極少，而且大部份都係背台位，有網民問坤哥：「係咪傳說中嘅開一面台？」無論係最貴嘅$480，定係最平嘅$180，幾乎九成都係背台位。

正喺紅館開演唱會嘅郭富城，今次就開足15場。城城一向愛錫歌迷，所以佢公開發售演唱會嘅門票就有三分一至一半，好多歌迷都能夠自己買飛入場支持偶像囉！至於將於下星期喺紅館開騷嘅天后鄭秀文(Sammi)，今次Sammi就開六場演唱會，門票已經售罄，雖然都係一票難求，但Sammi演唱會公開發售嘅門票就有三分一以上。