張敬軒一連兩場的《HinSideOut 2019張敬軒演唱會》澳門站，昨晚於威尼斯人金光綜藝館順利完成。軒仔特意重新設計H型舞台，配合他的英文名Hins，並為澳門站帶來兩套新歌衫及新歌《空手而回》。

軒仔以紅色印第安透視裝登場，獻唱經典hit歌《酷愛》，他明顯面圓圓兼腰間長了不少肉，有歌迷大叫：「肥咗嘅？」其後，軒仔亦於台上自嘲：「我今日唔可以鞠躬太多次，因為頂住個雞冠頭（印第安頭飾）同埋個肚腩。」唱《騷靈情歌》時，以閃閃紅色西裝現身的他，右邊頸上驚見「咖喱雞」。

軒仔換上水松木套裝獻唱《靈魂相認》時，投入演出的他唱到跪低，此時，軒仔驚呼：「我諗我真係肥咗，我跪爛咗條褲呀，Oh Shit！」他更自嘲肥到似糯米雞，幸好只是膝蓋位置爆開，未有走光。

軒仔為澳門站準備的新歌衫，於演唱會第五部分示人，背後畫上花卉圖案的黑色長褸配紅色高跟鞋。接著安歌部份，軒仔首次以分身「火龍果」身份處女登台，穿上一身螢光黃套裝配粉紫假髮，造型突出。唱到改編容祖兒新歌的惡搞歌《Pretty Hungry》時，「火龍果」抵死向台下掟火龍果，全程扭腰趷籮，更抵死說：「我係咪靈活過嗰個老野張敬軒呢？」全場哄笑。

有歌迷大叫「降兩度」，「火龍果」搞笑地說：「啱㗎啦，嗌大聲啲，大聲啲可以歡送佢㗎喇。我好忙，今晚冇帶祖兒姐嗰個假髮，所以求其拎住佢嗰個黎戴住先㗎咋。」「火龍果」感謝大家的喜愛，剛加入樂壇的「她」竟然宣佈說退出樂壇：「今次係我嘅告別樂壇之作。」之後跪下來向觀眾致謝。最後，軒仔兩度安歌後結束。

軒仔受訪時，談到頸上的「咖喱雞」，他笑住說：「梗係敏感啦，唔通喺後台進補咩？我個人好敏感㗎。」至於是否肥了不少？軒仔笑言自己開騷前似坐月：「我排完舞食好多㗎，都係肥咗2、3磅啫，鏡頭前梗係咁講啦，唔通話2、30磅咩？肥到落膝頭哥，香港站我都有跪都冇爆褲。」

提到11月將再開紅館騷，問他是否要立即減磅？軒仔說：「過多兩日先啦，其實我係第一次喺澳門開2場騷，好開心。我哋好嚴陣以待，成個台改哂，可謂一雪前恥，因為上次哮喘取消咗澳門嗰場。」他表示《HinSideOut》仍未巡迴完：「可以無限輪迴㗎，11月係新嘅，我手頭上有10個騷可以揀，畀啲客戶睇下邊個適合。」

至於為何要「火龍果」閃電退出樂壇？軒仔笑指是「火龍果」的決定，但直言他會為容祖兒復出，軒仔說：「佢發夢都叫住祖兒。其實而家喺街，啲人叫我『火龍果』多過張敬軒，睇下『火龍果』有咩搞啦。」軒仔自爆自費在淘寶買200個火龍果，掟給觀眾，他說：「仲貴過真㗎。」

--------------------------------
【六四30】守住歷史 拒絕遺忘
https://hk.adai.ly/zdzKtt2RiW
--------------------------------
【記住63836568】全民爆相爆片！下一個爆料王就係你
https://bit.ly/2Guolu9