【更新內容】
律政司未有尋求獨立法律意見下，決定不就UGL案檢控前特首梁振英。過去兩周一直「避風頭」的律政司長鄭若驊今午始肯就事件作簡短回應，聲稱律政司作刑事檢控的一貫做法，是內部決定，除非案件涉及律政司同事，才會外判。法律學者狠批鄭若驊破壞律政司過往一貫做法，自訂自己一套，「以後點令人信服？」

「好明顯今次真係偏離過往一貫做法。」香港大學法律學院首席講師張達明批評，鄭若驊的回應令人失望，「繼續講一啲與事實不符嘅言論，好難令人信服，大家有眼睇」。他指，過往律政司處理多宗涉及高官的案件，包括前財政司長梁錦松涉偷步買車、前行會成員林奮強涉偷步賣樓，前廉政專員湯顯明涉受賄，以及前特首曾蔭權涉貪案，律政司均有徵詢獨立法律意見。

「喺梁振英事件中，睇唔到有任何理由會偏離一貫程序去做」。張達明強調，尋求獨立法律意見的重要性，是避免外界覺得律政司有偏私偏頗，無論案件涉及現任或前任官員，甚至國家領導人，「如果剩係律政司自己做決定，唔會令公眾信服你個決定冇偏私、冇偏袒或冇政治考慮」。

張達明認為，今次鄭若驊重新演譯徵詢獨立法律意見的準則，不但破壞過往一貫做法，更自訂自己一套，「呢個係令人擔心，以後點令人信服？點知個決定係冇偏私或冇所謂政治考慮？」他指，律政司至今仍沒交代，究竟誰下決定不就UGL案檢控前特首梁振英，鄭若驊也以內部保密及專業操守為由，拒絕交代詳情，「佢似乎自訂緊自己一套做法，唔需要公開，我有擔當就自己處理，呢個好大問題，好似真係走緊個人治社會」。

大律師公會前主席梁家傑直言，從未聽聞案件只在涉及律政司同事，才會徵詢獨立法律意見。他認為鄭的回應完全站不住腳，只是「死雞撐飯蓋」，更是無私顯見私，「不過，無恥就最無敵，佢可以話今日開始係咁，或者我上任之後係咁，加多兩個字，吹咩，我睇到佢態度就係咁」。

梁家傑認為，律政司在處理UGL案中，除沒尋求獨立法律意見外，至少有兩個疑點仍未釋除公眾疑慮。其中是律政司早前的聲明指，「證據未能確立戴德梁行不同意梁振英接受這些款項」，但不代表戴德梁行股東接納，「呢啲係環境證供，但就完全冇解釋，係迴避問題」。另一疑點，梁振英在任特首時收取部份UGL餘款，沒有向行政會議披露，卻獲「放生」，律政司也沒解釋原因，「咁煲呔坐監咪好冤枉？」

鄭若驊今日會見傳媒時，多次強調律政司是不偏不倚。梁家傑反駁：「等如醉酒鬼話自己冇醉一樣，以為自己講大聲啲就真。」他批評鄭不但未有詳細交代不提檢控原因，更將司法獨立自我收窄，「將個圈越收越窄，窄到只係DOJ（律政司）同事涉案，至需要外判大律師找獨立意見」。

梁強調，外判原因是避免私相授受，「就係要釋疑」，但擔心鄭若驊自我收窄，把獨立法律意見「廢了武功」，「法治其中一個原則，係要秉行公義必須有目共睹，Justice should not only be done, but seen to be done，點解要外判就係要seen（被看見），你依家將個圈收到咁窄，真係無恥最無敵」。