奪2010年港姐季軍嘅莊思明去年被發現搭上陳慧琳胞弟陳司翰（Victor），佢哋仲喺車廂激咀令戀情曝光，雖然莊思明一直唔肯認拍拖，但佢哋就冇避忌咁孖住周圍去，有指「明翰戀」近日出現暗湧，不時有小風波。莊思明同Victor前日凌晨拍拖去澳門夜蒲，佢哋諗住去夜場ClubCubic狂歡，不過未入場就被發現喺街頭吵大鑊，仲驚動澳門警察到場。

馮仁昭噚日打畀莊思明，提到Victor，佢即咿咿哦哦話：「我冇講過大家有乜嘢關係，我向來唔鍾意講私人感情。」莊思明始終唔肯確認Victor男友身份：「嗰晚我哋一班朋友去。」二人可有出現爭拗，莊思明扮失憶話：「冇特別嘢發生。」馮仁昭指出有人親眼目擊，莊思明就話：「如果你哋話見到，我都阻止唔到。」
提起件事仲搞到有警察到場？莊思明先肯解畫：「冇乜嘢，唔使擔心，唔關嗌交事，係嗰度啲工作人員對我唔禮貌。」Victor有冇上前「幫拖」護駕？莊思明話：「唔好話『幫拖』，當時好多朋友都了解緊，唔關Victor事。」問到可會視Victor係結婚對象？佢好避忌咁話：「呢啲唔答。」其實Victor上月底有出席莊思明三姊妹時裝店嘅開幕派對，但全程冇合照。