前英格蘭代表隊前鋒朗尼喺英國柴郡嘅一次醉酒駕駛被捕，瞬間演變成一場疑似背住大肚老婆高蓮偷食嘅鬧劇。原本帶住三個囝喺外國度假嘅高蓮即刻仆返英國之餘，更加拖埋三個囝離家出走，盛傳會同朗尼離婚咁話。

英國有傳媒惟恐天下不亂，就算無相，都大字標題寫住「有人見到高蓮除咗結婚戒指」嚟大造文章，仲登埋疑似小三Laura Simpson嘅訪問，呢一part就更加精彩，事關報道竟然 引述Laura同高蓮講，唔好淨係嬲朗尼一個！篇訪問內容係咁嘅......

「我好明白高蓮因為朗尼俾警察拉咗而覺得好嬲，咁真係蠢到無人有。諗真啲，朗尼其實都真係唔應該揸我架車，但佢橫睇掂睇都唔似係好醉囉！但講真，高蓮唔應該為咗我同朗尼之間發生嘅事而嬲佢，因為我哋根本乜都無發生過，我哋所做嘅其實都係無傷大雅。我知件事睇落好衰，但其實真係唔係咁囉，高蓮要嬲嘅話就應該連我都嬲埋！」

報道亦都話Laura個妹Eden喺Facebook喪鬧自己家姐，話佢嘅行為令成家人都蒙羞，仲話以後都唔會再同Laura講嘢喎；不過Laura就話唔覺得事態有咁嚴重。