中文大學每月均會舉行EMBA論壇，早前請來醫院管理局主席胡定旭做演講嘉賓。胡主席不鳴則已，一鳴驚人，佢一開口就倒醫管局米。佢話兩個月前，見到一名舊同學，佢係一個好有錢嘅律師，但患咗糖尿病。
佢同胡主席講，上星期日凌晨二時，喺屋企暈倒，入咗將軍澳醫院，住咗三日，服務好到無得講。於是呢位律師向朋友推介醫管局嘅服務。胡主席一聽，居然叫佢千祈唔好，因為醫管局多睇一個病人，就蝕多啲。保守估計，病人每日住院大概花咗三千多元，但醫管局只收佢哋一百元。
胡主席好慨歎咁話，二千年以前，醫管局員工工作得好開心，私家醫生嘅市場亦好好，好多醫生累積咗經驗後，就向外闖轉做私家醫生，呢個交接模式好健康。不過，經濟轉差後，私人醫療市場唔好，資深醫生無誘因離開，喺下面嘅人無得升。

解決財赤冇辦法

現時員工工作多年，不但減咗人工，工作量重愈嚟愈多，又無晉升機會，病人要求又愈嚟愈高，佢哋對前景悲觀，無安全感。佢話，搞成咁可能係醫管局自己一手造成，服務好，收費便宜，自然好多病人湧嚟。八方諗，醫管局啲員工聽到主席咁講，條氣都順啲。
咁點樣解決財赤呢？有學生建議，醫管局嘅品牌咁好，可以搞纖體服務，因為一個療程要三、五千元，都好好賺。胡主席就話，可以搞個醫療中心，專收私家病人。不過，佢擔心現時病人普遍輪候一至兩年，如果為咗賺錢，醫管局再分咗啲員工做呢啲嘢，加長咗病人輪候時間，就會有人嘈醫管局。總之，八方聽完佢講咗成個talk，都係無解決辦法。


爆料熱線：29290000、27860099
報料傳真：26239278
報料電郵：[email protected]