雨僑、沈震軒同蘇志威今日喺尖沙咀出席婚禮雜誌頒獎禮，今個月31號就係雨僑同羅力威結婚，今日雨僑就預演婚禮，着咗兩套婚紗行騷，一件露肩婚紗非常性感，雨僑笑言感覺好童話，滿足晒佢嘅要求，所以婚禮當日唔會更性感，想輕鬆啲，佢笑言自己係個沙膽新娘：「我真係好沙膽，最後兩星期仲未見過套婚紗同晚裝，不過我好相信個設計師，佢話送婚紗畀我出嫁，我哋好有默契。」

雨僑話現時心情好興奮，親自派帖畀親友，問到會唔會請容祖兒？雨僑就話老公會請，但就唔知會唔會請劉浩龍，佢話：「催婚到時就交畀你哋嘞！」但記者話有傳聞佢哋分咗手，雨僑即刻話：「唔好意思呀，我唔知，唔好意思，我只知花球好多人book咗。」

另外，沈震軒就話遇到啱嘅另一半就會閃婚，問到之前同嗰個女仔一齊行花市，係咪新女友？沈震軒就甜絲絲，笑晒口咁話：「想秘密少少啦，自己有努力，因為都好嚮往喺教堂行禮。」

精選娛聞，喺晒《娛果》
http://fb.com/appledailyent