【解釋咁牽強都信】藤吉久美子被爆婚外情 太川陽介信老婆唔會離婚
蘋果日報 2017/12/15 08:00
婚外情藤吉久美子太川陽介
藤吉久美子被爆搞婚外情。
現年56歲嘅日本老牌女星藤吉久美子被雜誌《週刊文春》踢爆不忠，背住結婚22年嘅圈中人丈夫太川陽介密會電視台監製。藤吉久美子被發現同監製於宮城嘅酒店過夜，佢又趁老公到京都開工，搭巴士去到姦夫位於東京嘅住宅單位密會兩小時。
對於太太被爆有婚外情，太川陽介噚日會見傳媒，話對太太絕對信任，唔會離婚。太川陽介憶述《週刊文春》記者上周六話佢知太太偷食，追問回應時，即時覺得晴天霹靂，等藤吉久美子返到屋企即刻追問究竟發生咩事。
太川陽介話藤吉久美子解釋係自己行為輕率，但絕對同該名電視台監製冇越軌行為，對於被發現喺宮崎嘅酒店過夜，太太解釋話係工作太累喺酒房瞓咗，監製擔心佢又入埋去，太川陽介又代太太解釋話佢平日間中都會搭巴士，所以絕對唔係會姦夫。雖然呢個解釋好牽強，不過太川陽介話審問咗太太三、四個鐘之後，選擇相信太太，仲話絕對唔會離婚。
更多娛聞，喺晒《娛果》
http://fb.com/appledailyent
http://fb.com/appledailyent
其夫太川陽介噚日現身記招會傳媒，神情輕鬆。
太川陽介相信太太嘅解釋，話唔會離婚。
雜誌《週刊文春》拍得藤吉久美子密會電視台監製。