美國樂壇大姐大麥當娜(Madonna),入行以嚟始終擺脫唔到票房毒藥嘅稱號,由於佢嘅演技實在令人慘不忍睹,所以最近佢亦喺一個「史上最差歌手演員」嘅選舉上,勇挫瑪麗嘉兒(MariahCarey)同BritneySpears等演技極差嘅人馬成為冠軍。
眾望所歸
娜姐雖然喺音樂事業上屢創佳績,但喺電影方面可謂屢戰屢敗,美國音樂雜誌《Blender》最近重選佢為「史上最差歌手演員」,雜誌編輯話:「娜姐曾經喺唔少電影入面扮演性感尤物,但就一啲都唔性感。佢講對白嗰陣亦好唔自然,往往好似大聲宣讀癡纏狂嘅信件一樣!」而娜姐早前主演由佢老公執導嘅《惡女漂流記》,更加係佢嘅失敗之作,所以佢獲選「史上最差歌手演員」,都係實至名歸。
貓王第五
而位列第二嘅係樂壇殿堂搖滾歌手卜戴倫(BobDylan),相信因為佢演戲嗰陣同唱歌時一樣,都係木無表情之故,令佢嘅排名重高過第三位嘅瑪麗嘉兒同第六位嘅Britney。
至於喺生前拍過超過三十部賣座電影嘅貓王皮禮士利(ElvisPresley),居然排喺Britney之前,位列第五,相信唔少貓王迷睇見都眼火爆!另外,樂隊BonJovi主音JonBonJovi雖然前日喺紐約同年輕創作歌手JohnMayer一齊出席聖誕慈善表演,但佢亦唔好彩獲選為最差歌手演員第四位。