一直盛傳同老公薛嘉麟婚變嘅諸葛紫岐(Marie)，今晚孖住咁去飲金利豐太子朱俊浩嗰餐，兩人恩愛到場，影合照時薛嘉麟攬住愛妻條腰，擺明要打破婚變傳言。

之前諸葛紫岐受訪話婚姻關係係春天未到夏，今晚記者問兩人係咪和好和好同埋到咗夏天？薛嘉麟話：「老婆話春天就春天啦。」老婆o依家話咩就咩？佢話：「係家訓嚟嘅。」問聖誕襯機會否再度蜜月，薛嘉麟就話聖誕老婆會陪個仔，結婚以後亦都冇試過度蜜月。

問薛嘉麟有咩補償，佢就同身邊嘅老婆話：「有咩就出聲啦，要啲咩直接講。」記者問薛嘉麟係咪咩都比老婆？佢話：「佢咩都比晒我，我咩都比佢。」Marie在旁笑言：「好識講嘢喎依家。」

會唔會放個大假陪老婆？薛嘉麟表示：「我隨時都準備陪佢。」Marie就話：「你唔好講大話呀。」記者笑言係咪要生返個B，薛嘉麟話：「要問返個仔意見。」