擇偶重頭腦內涵

蘋果日報 2002/01/26 00:00


葉靜子曾與賽車手關兆昌拍拖三年,但卻未能開花結果,經歷愛情傷痛的她,會否對愛情卻步?
靜子笑說:「隨緣啦,拍拖呢啲嘢唔可以夾硬嚟,我咁忙,開心咪得囉,我又唔會因為之前分手嘅事而唔開心,去鑽牛角尖話以後唔拍拖。

數歷情傷未卻步
「每一次拍拖都會有開心同唔開心,況且我份人就算嬲、唔開心都只係幾日嘅事。我同過關兆昌拍拖係事實,但當初冇諗過咁高調,我又唔係自己攞嘢出嚟講,但就有啲無奈,我係做事嘅人,我怕畀人覺得我喺度宣傳。
「我經歷過幾段愛情,雖然每次都唔能夠開花結果,但我最多謝嘅係我屋企人,佢哋畀我好大嘅自由空間。

戀賽車手蠱惑仔
「好多人會奇怪,點解我每次拍拖嘅對象,都唔係乜嘢名門望族,會係蠱惑仔、賽車手咁,其實係因為我爹哋話過,無論佢哋鍾唔鍾意都唔緊要,因為陪我走下半世嘅人係我嘅另一半,唔係佢哋,最緊要我開心。所以喺揀男朋友呢方面,我可以好自由,唔知呢招叫唔叫做欲擒先縱呢?
「不過𠵱家我已經有嫁唔出嘅打算,因為以前冇咁多報紙寫我時,人哋見我有咁嘅背景已經要諗諗先,更何況傳媒𠵱家成日畀啲緋聞男友我,重邊有人敢追我呀,結婚呢樣嘢令我覺得係件冇乜可能性嘅事。其實我份人喺揀男朋友方面,真係冇乜要求,我鍾意有內涵同有頭腦,其他嘢就唔係咁重要。」