前港姐楊思琦三年前未婚生女，其後爆出搭上「空心老倌」吳帥，思琦妹選擇獨力湊個女，今日有周刊爆，思琦妹同富貴新歡同車，更指思琦妹忽然好有米，連買兩個天晉單位，價值2千萬元，又換咗架新嘅七人車，請埋司機接囡囡Krystal返學。

思琦妹入行以嚟，一直有慳妹之稱，連平時買餸都精打細算，不過，佢近排忽然買車、掃樓，有傳佢秘交四十幾歲已婚富商高健行一年，高健行早年做金融起家，手持超過3億物業，目前框格音樂嘅老闆，曾投資過唔少演唱會，高健行更已婚有一仔一女，為人比較低調，甚少同明星合照，唔少圈中人都知佢係邊個。

思琦妹離開大台後，亦不時出席對方公司負責搞嘅娛樂活動。據知情者講，最近思琦妹去高健行搞嘅活動，二人都冇咁避忌，有時去到現場，佢哋都黐埋一齊，估佢哋交情唔錯，上個月框格音樂搞李國祥個唱，思琦妹竟然喺後台現身，同小恩子黎瑞恩及劉小慧等合照，更被影到同高健行同坐七人車。

周刊又指，思琦妹本來成日接內地騷同酒吧騷搵真銀養家，騷價有成5、6萬一場，本身思琦妹又要供三層樓，又要畀愛女讀名校，生活真係好慳，之不過，最近忽然180度轉軚，兩年內用親戚名義，買入兩個將軍澳天晉千萬單位，仲換埋77萬嘅LandRover新車，登記車主姓徐。

思琦妹身邊人都話幾個月前，思琦妹都同熟啲嘅朋友講自己拍緊拖，唔介意再生BB，似乎係發展呢段新戀情噃!?

而楊思琦透過電話回應《蘋果》，佢否認Peter係新歡，又謂唔認識對方老婆。