今屆區議會選舉，唔少政治素人成功突襲，擊敗資深區議員當選，好似大埔區新民主同盟周炫瑋，將民建聯喺該區廿幾年嘅黃容根一舉擊敗，傘後組織「埔向晴天」成員劉勇威，亦喺大埔墟及太湖選區打敗民建聯嘅張國慧。

新一屆區議會今日正式開鑼，首次會議都係選下主席、傾下成立委員會同工作小組之類，而劉勇威已經急不及待喺大埔區議會提動議，「處男作」獻咗畀TSA，要求「取消小三TSA及檢討TSA制度」，還學生一個快樂童年。

新丁議員初試啼聲，劉勇威發言淡定，表現算係唔錯嘞，最後大埔區議會主席張學明話呀，相關議題要交由相關委員會處理，所以今日大會未進入討論。至於其他新丁議員，好似周炫瑋以及年僅26歲嘅前大埔區議員羅舜泉之子羅曉楓等，首次大會上未有發言機會，唔通好戲在後頭？