謝霆鋒孭飛嘅內地綜藝節目《12道鋒味》一連拍足三輯，而霆鋒近日仲斥資200萬港幣公開招募廚神，大搞《鋒味》鋒廚海選，新一季節目，霆鋒將會率領鋒廚團隊，同全球各地頂級廚藝高手挑機。首先會喺60位參加比賽嘅大廚中，喺上海通過兩輪甄選，選出8位加入霆鋒團隊，佢哋仲會並肩作戰。

有興趣參賽嘅大廚，可以將廚藝video上傳去指定網站進行海選，選出60位入圍大廚再去到上海比賽，佢哋不限題材煮出撚手菜。霆鋒日前接受電話訪問，講到點解有呢個構思，佢主動話：「參賽者唔一定係來自民間，亦可以係酒店做開嘅大廚，主要想多啲人參與一齊玩，主要想發掘美食界好煮得嘅人，尤其香港追求美食夢好難，租金貴、食材又貴，各樣競爭大。」所以勝出者就可以得到獎金完成美食夢。霆鋒繼續話：「有一筆資助係好事。」霆鋒講到參賽規則，佢話：「本月底會開始畀有興趣參賽者上傳烹飪短片去我facebook，到8月中前揀60位，再去上海做PK賽，選出8人加入我團隊，同我一齊周遊列國，同其他大廚比試。因為好多人想挑戰《鋒味》，我唔知點死。」

陪霆鋒捱到最後12集嘅3人，佢哋將得到約200萬港幣創業基金。霆鋒話：「冠軍100萬（人民幣），亞軍50萬，季軍就有30萬，今次希望可以吸納到唔同國籍朋友參與，我會喺facebook畀貼士參賽者去準備。」評判團方面，霆鋒話：「節目組未講定，好多當地美食家，又有可能係平民老百姓。」霆鋒仲話嗰筆約200萬創業基金，會嚟自佢同贊助商同節目組拎出嚟：「參賽者加入我團隊，大家要講默契。」霆鋒認為煮中餐比較考技巧：「工具比較複雜，要講火喉、爐頭。」