阿根廷傳媒早前報道，已經由中超上海申花回到家鄉球隊小保加效力嘅「麻煩友」泰維斯，早前向球會聲稱因為打高爾夫球時整親小腿肌肉，最終證實要休息三周。不過阿根廷傳媒《號角報》就踢爆泰維斯「講大話」，事實上泰維斯係去監獄探監時踢波受傷！

報導話國際賽期間，現年已經34歲嘅泰維斯無份入選阿根廷國家隊，佢就去咗哥多華一個監獄，探望因為搶劫運鈔車而被判入獄16年嘅哥哥。可能佢去到監獄好受歡迎，突然技癢打算一展球技，決定參加咗監獄入面一場「野蠻足球賽」，踢咗廿幾分鐘嘅泰維斯，賽後就發現自己小腿肌肉拉傷咗囉！可能怕球會責罰，所以泰維斯就作咗個「大話」，話喺打Golf時整親，不過紙此終係包唔住火啫。

今年1月已經第3次加盟母會小保加嘅泰維斯一向麻煩多多，先喺效力歐洲球會期間，多次扭計話思鄉要返小保加；2017年去到中超加盟上海申花就成日玩野「出工不出力」，仲同外界講話中國足球過多50年都係唔掂、中國球員冇踢波天份，咁樣踩米飯班主最終咪同申花解約囉。今年返到小保加踢咗5場入咗3粒，佢仲話希望重返國家隊，以為佢會生生性性點知又整傷自己，睇嚟佢都係擺脫唔到「麻煩友」嘅污名囉！

--------------------
係你！打造星級球隊，征服各地聯賽！立即加入『BFB CHAMPIONS 2.0』！ http://bit.ly/2xrTKGM