網民設計建制派議員入中聯辦的「夜茶」菜單後，民間電台今晚喺旺角倫敦大酒樓筳開50席，慶祝該台成立十週年時，就整咗個真係食得嘅「一離易發晚宴」「夜查」菜單。

呢份「夜查」菜單包括三味熱燻「廢柴煨蝦碌」、「百密有兩蔬」、「查罪炒魷魚」。四道主菜，包括「硬膠低B亂咁羹」、「否決政改一等掌」、「清蒸西環好瘀扎扎跳」同「紅燒班長吹錯雞」。

尾單當然唔少得去飲必食嘅伊麵、飯同甜品，包括「人蠢無藥伊」、「黨鞭一舊飯」、「唔等發叔食甜品」同「建制下價橙」，再嘆埋啤酒聽民間電台，就可以「拉隊離場」散席咁話。

有份去飲嘅新民主同盟范國威話，唔少賓客見到呢份菜單都先爆笑再「相機先食」，未開席即用影低菜單上載facebook分享，話自己最鐘意「百密有兩蔬」呢道菜喎。