𠵱家發展商賣樓，左搞右搞都賣唔晒，為咗要賣得快，有時都要信吓風水，求個心安同希望。電盈嘅薄扶林貝沙灣，第一期起五百四十四個住宅單位，零丁得嚟又「死」「死」聲，好似唔多吉利，但蘭西聽坊間傳言，係經高人指點，用紫微斗數算過至咁起，唔怪得個盤可以去得咁快啦，未夠半年已經差唔多賣晒。
蘭西記得，新地嘅跑馬地禮頓山，好似都係得五百四十四伙，樓盤一日賣清，收成九十億。睇嚟電盈都想好似新地賣得咁好。另信和屯門海典軒都係得五百四十四伙喎，乜又咁啱嘅？
不過，蘭西請教過風水高人蘇民峰師傅，佢就話冇咁嘅可能，因為五字喺風水術數嚟講，係屬於「五黃」，即係病符咁解，真係唔吉利。而風水學根本唔注重單位數量呢樣嘢。

發展商出口術打心理戰
近呢個幾禮拜，樓市氣氛進一步向好，發展商嘅口風即刻轉晒軚，揚言新盤唔減價之餘，重開始話要加價㖭。
其實𠵱家樓市呈兩極化，百零萬嘅上車盤，或者係千萬元以上嘅豪宅，承接力都唔使擔心，咁啱近排推出嘅，都係呢類單位，所以咪覺得個市好咗囉。發展商出埋口術，睇怕都係銷售手法，同買家打心理戰，希望想谷旺個市就真。
上個禮拜金管局話3至5月樓價跌咗八個巴仙，暗示銀行要留心，可能有業主會斷供。